Azərbaycan rəsmiləri Paris-2024 Yay Olimpiya Oyunlarında güləş yarışlarını izləyir.

Azərbaycanın yunan-Roma güləşçisi Sənan Süleymanov (77 kq) və Mariya Stadnik (50 kq) Fransanın paytaxtı Parisdə keçirilən Yay Olimpiya Oyunlarında mübarizəyə başlayıblar.

S.Süleymanov 1/8 final mərhələsində Bolqarıstanı təmsil edən Ayk Mnatsakanyanla qarşılaşıb. Görüş idmançımızın 2:0 hesablı qələbəsi ilə yekunlaşıb. Növbəti mərhələyə keçən S.Süleymanov 1/4 finalda macarıstanlı Zoltan Levayla qalib gələrək adını yarımfinala yazdırıb.

M.Stadnik isə 1/8 final mərhələsində almaniyalı Anastasiya Blayvasla üz-üzə gəlib. Rəqibinə 6:2 hesabı ilə qalib gələn Stadnik 1/4 finala vəsiqə qazanıb. O, növbəti raundda Monqolustan təmsilçisi Otqonjarqal Dolqorjavlaya məğlub olub. Dolqorjav finala vəsiqə qazansa, Stadnik təsəlliverici qarşılaşmaya çıxacaq.

Görüşləri Milli Olimpiya Komitəsinin vitse-prezidenti Çingiz Hüseynzadə, Gənclər və İdman naziri Fərid Qayıbov, MOK-un baş katibi Azər Əliyev, nazir müavini Mariana Vasileva, Azərbaycan Güləş Federasiyasının prezidenti Mikayıl Cabbarov və Olimpiya çempionu Fərid Mansurov da canlı izləyir.