Park və məktəb həyətləri yalnız yaşıllıq üçün istifadə olunmalı deyil. Burada idmanla bağlı da yenilik olmalıdır. Bunun üçün planlaşdırma zamanı idman mütəxəssislərinin də rəyi öyrənilməlidir.

Bu sözləri Milli Olimpiya Komitəsinin (MOK) Xarici Əlaqələr idarəsinin müdiri Anar Bağırov Ümumdünya Şəhərsalma Forumunun 13-cü Sessiyası (WUF13) çərçivəsində keçirilən “Şəhərlərdə idmanın inteqrasiyası” mövzusunda çıxışı zamanı deyib.

O bildirib ki, şəhər vacib infrastruktura çıxışı təmin edir: "Hər il minlərlə gənc idman tədbirlərində çıxış edir. Biz idmanla bağlı proqramlar təşkil edirik. İdmanı gündəlik həyat tərzinə çevirmək lazımdır".

Anar Bağırovun sözlərinə görə, MOK idmanla gündəlik həyat arasında körpü yaradır: “Peşakar olmayan idmançılara da dəstək veririk ki, onlar sağlam həyat tərzinə qovuşsunlar. İdman yalnız çempion olmaqla bitmir. Biz, həmçinin təhlükəsiz idmana önəm veririk. Düşünürük ki, təkcə çempion yox, gələcək üçün yaxşı insan yetişdirməliyik".