Azərbaycan Atçılıq Federasiyasının (ARAF) təşkilatçılığı ilə Binə Atçılıq Mərkəzində Peşəkar Çövkən Liqasının XXII turun son oyunları və mükafatlandırma mərasimi keçirilib.

Azərbaycan Atçılıq Federasiyasının mətbuat xidmətindən verilən məlumata görə, günün açılış görüşündə “Elit” və “Sərhədçi” komandaları qarşılaşıblar.

Gərgin idman mübarizəsi şəraitində keçən oyunda “Elit” komandası rəqibini 2:1 hesabı ilə məğlub edib. Bu nəticə ilə “Elit” turniri 54 xalla ikinci sırada tamamlayıb. Liqa boyunca stabil çıxışı ilə fərqlənən “Sərhədçi” isə ümumilikdə topladığı 57 xalla Peşəkar Çövkən Liqasının qalibi olub. “Polad” çövkən komandası isə 53 xal toplayaraq üçüncü yerin sahibi adını qazanıb.

Oyunlardan sonra mükafatlandırma mərasimi keçirilib.

Tədbirdə ARAF-ın prezidenti Elçin Quliyev və vitse-prezident Cavid Abdullayev komandaların heyətlərinə diplomlar, medallar və birinci yerin qalibinə kubok təqdim ediblər.