Bu gün Azərbaycan Milli Olimpiya Komitəsinin (MOK) yaranmasından 34 il ötür. 1992-ci ildə yaradılan bu ali idman qurumu, ötən illər ərzində Azərbaycanın dünya miqyasında nüfuzlu idman ölkəsinə çevrilməsində müstəsna rol oynamışdır.

Azərbaycan MOK-u 14 yanvar 1992-ci il tarixində təsis edilib. 1992-ci il martın 10-da isə Azərbaycan Respublikasının Ədliyyə Nazirliyində qeydiyyatdan keçib. 1992-ci ilin noyabrında Avropa Olimpiya Komitəsinə (AOK) daxil olub. 1993-cü ilin sentyabrında Beynəlxalq Olimpiya Komitəsinin (BOK) Monako keçirilən Baş Assambleyasında BOK tərəfindən tanınıb.

Milli Olimpiya Komitəsinin fəaliyyətində mühim hadisələrdən biri də 1997-ci ildə cənab İlham Əliyevin MOK-un prezidenti seçilməsi olmuşdur. Məhz bu dövrdən başlayaraq MOK-un beynəlxalq əlaqələri yüksək səviyyədə qurulmuş, idmana, idmançılara dövlət səviyyəsində diqqət və qayğı daha da artırılmış, ölkəmizdə idmanın maddi-texniki bazası gücləndirilmiş və Olimpiya Hərəkatı kütləvi xarakter almışdır.