Maribor-2023 XVII Avropa Gənclər Olimpiya Festivalı çərçivəsində keçirilən cüdo yarışları davam edir. Bu gün Azərbaycan komandasının daha 4 (2 oğlan, 2 qız) cüdoçusu tatami üzərinə çıxıb.

Təmsilçilərimizdən Məhəmməd Musayev (-60 kq) 1/16 finalda polşalı Yakob Kurovskiyə qalib gəlsə də, növbəti mərhələdə rumıniyalı Tudor Mosoi ilə görüşdə məğlub olub. İdmançımız üçüncü yer uğrunda təsəlliverici görüşdə mübarizə aparacaq. 

-66 kq çəki dərəcəsində mübarizəyə başlayan Cəsur İbadlı da ilk görüşünü qələbə ilə başa vurub. İdmançımız 1/16 finalda rumıniyalı Andrei Buqaya, növbəti görüşdə isə fransalı Kais Quettariyə qalib gəlib. Cüdoçumuzun 1/4 finaldakı rəqibi niderlandlı Bazile la Fontayne olacaq. 

Qızların mübarizəsində isə Vüsalə Hacıyeva (-48 kq) ilk görüşdə Rumıniya təmsilçisi Lorena Mandanı ipponla məğlub edib. Cüdoçumuz növbəti görüşünü italiyalı Janka Juttnerə qarşı keçirəcək. 

Digər cüdoçumuz Xədicə Qədəşova (52 kq) isə ilk mərhələdə italiyalı Martina de Kresçenzodan güclü olub. İdmançımız növbəti görüşdə Elise Rustige ilə qarşılaşacaq. 

Xatırladaq ki, Maribor-2023-də Azərbaycan komandasının aktivində iki bürünc medal var. Komandamıza medalları cüdoçular Nihad Məmişov (-50 kq) və Ayxan Mirzəzadə (-55 kq) qazandırıb.