Bəhreynin ev sahibliyi etdiyi Gimnaziada İdman Oyunlarının təntənəli açılış mərasimi keçirilib.

Əl-Riffa şəhərində yerləşən "Milli Stadion"da təşkil olunan tədbir iştirakçı ölkələrin paradı ilə başlayıb.

Azərbaycan Bayrağını paraüzgüçü Əli Vəliyev və taekvondoçu Xuraman Cavadzadə dalğalandırıblar.

Ardınca Bəhreynin Dövlət Himni səsləndirilib.

Tədbirdə Bəhreynin təhsil naziri Mohammad bin Mubarak Cuma və Beynəlxalq Məktəb İdmanı Federasiyasının birinci vitse-prezidenti Yusif Belqasimi çıxış ediblər.

Rəsmi çıxışlardan sonra Gimnaziada İdman Oyunları açıq elan olunub.

Açılış mərasimi bədii hissə ilə davam edib. Musiqi sədaları altında maraqlı rəqs şouları nümayiş olunub.

Qeyd edək ki, oktyabrın 30-dək davam edəcək yarışlarda 26 idman növü üzrə 71 ölkədən ümumilikdə 18 yaşadək 3687 idmançı mübarizə aparır. Azərbaycan Gimnaziadada 16 növ - aerobika, bədii və idman gimnastikası, badminton, boks, kamandan oxatma, güləş, tennis, taekvondo, stolüstü tennis, qılıncoynatma, şahmat, cüdo, paracüdo, üzgüçülük və paraüzgüçülük üzrə 160 idmançı ilə təmsil olunur.