"Səhər oyananda çempionluq barədə düşünürdüm, gün məndən yana oldu. Bu şansı dəyərləndirdim və dünya çempionu oldum".

Bu sözləri Azərbaycan cüdoçusu Əhməd Yusifov (-60 kq) Bakıda keçirilən cüdo üzrə böyüklər arasında dünya çempionatından sonra jurnalistlərə verdiyi müsahibəsində deyib. 

O qeyd edib ki, 60 kq çəki dərəcəsində ölkəmizə ilk dünya çempionluğunu qazandırdığı üçün qürur hissi keçirir.

​"Final görüşüm ilk anlarda gözlədiyim kimi keçməsə də, sonradan özümü toparlamağı bacardım. Öz fəndimi tətbiq edərək qalib gəldim. Sevincimin həddi-hüdudu yoxdur. Daha öncə məğlub olduğum rəqibimlə görüşə bu dəfə revanş almaq və çempion olmaq əzmi ilə çıxmışdım. Tatamidə kəmərdən tutub üstünlük əldə etdiyim an artıq qalib gələcəyimi tam hiss etdim", - deyə Əhməd Yusifov bildirib.

​Dünya çempionumuz bu qələbənin Azərbaycan cüdo tarixində xüsusi yer tutduğunu vurğulayaraq deyib: "Azərbaycan cüdo tarixində 60 kq çəki dərəcəsində indiyədək heç kim dünya çempionu olmamışdı. Ölkənin 4-cü dünya çempionu kimi tarixə düşmək mənim üçün sözlə izah edə bilməyəcəyim bir xoşbəxtlikdir.

​Bu uğurda üzərimdə əməyi olan bütün məşqçilərimə minnətdarlığımı bildirirəm. Artıq dünya çempionuyam, lakin dayanmaq fikrim yoxdur. Növbəti əsas hədəflərim Avropa və Olimpiya çempionu adını qazanmaqdır".