Türkiyənin İstanbul şəhərində keçirilən güləş üzrə lisenziya xarakterli Dünya Olimpiya Təsnifat turnirində uğurla çıxış edən yunan-Roma güləşçilərimiz Paris Olimpiadasına daha bir lisenziya əldə ediblər.

Bu uğura 87 kq çəki dərəcəsində çıxış edən dünya, Avropa çempionumuz, Tokio-2020 Yay Olimpiya Oyunlarının bürünc mükafatçısı Rafiq Hüseynov nail olub. 35 yaşlı pəhləvanımız təsnifat mərhələsində yunanıstanlı İlyas Paqkalidisə (3:1), 1/8 finalda isə hindistanlı Kumar Sunilə (4:3) qalib gəlib. 1/4 finalda isveçli Aleksis Kessidisdən güclü olan (2:1) güləşçimiz yarımfinalda gürcüstanlı Laşa Qobadze ilə qarşılaşıb. Həlledici görüşdə rəqibinə 4:1 hesabı ilə qalib gələn Rafiq Hüseynov ümumilikdə güləş millimizin Paris Olimpiadasına 10-cu, yunan-Roma güləşçilərimizin isə 4-cü lisenziyasını qazandırıb.

Bununla da Azərbaycan Olimpiya komandasının Paris-2024 Yay Olimpiya Oyunlarına əldə etdiyi lisenziyaların sayı 20-yə çatıb.