Dekabrın 17-18-də Albaniyanın paytaxtı Tirana şəhərində İslam Həmrəyliyi İdman Assosiasiyasının (İSSA) 13-cü Baş Assambleyası keçirilib.

İclasda Azərbaycanı Milli Olimpiya Komitəsinin vitse-prezidenti və İSSA-nın ikinci vitse-prezidenti Çingiz Hüseynzadə, baş katib Azər Əliyev, İSSA-nın İcraiyyə Komitəsinin üzvü və Ər-Riyad-2025 İslam Həmrəyliyi Oyunlarının Koordinasiya Komissiyasının sədri Könül Nurullayeva və MOK-un xarici əlaqələr departamentinin direktoru Anar Bağırov təmsil edib.

Əvvəlcə İSSA-nın 41-ci İcraiyyə Şurasının iclası keçirilib. Ardınca İSSF-nin Baş Assambleyasının iclası öz işinə başlayıb.

İclasda Baş Assambleyanın gündəliyindəki məsələlər, qarşıdan gələn oyunlar üzrə planlar və strategiyalar haqqında müzakirələr aparılıb.

Daha sonra 2025-ci ildə Səudiyyə Ərəbistanın paytaxtı Ər-Riyad şəhərində keçiriləcək VI İslam Həmrəyliyi Oyunlarının tarixi və idman proqramı iştirakçılara təqdim olunub.

VI İslam Həmrəyliyi Oyunları 2025-ci il noyabr ayının 7-dən 21-dək 13 Olimpiya, 4 qeyri-Olimpiya, 3 Paralimpiya ve 1 milli idman növləri üzrə keçiriləcək.

Milli Olimpiya Komitəsinin mətbuat xidməti