Xəbərlər

Mingəçevirdə avarçəkmə üzrə Azərbaycan çempionatına start verilib

14 sentyabr 2023 493

Gənclər və İdman Nazirliyi, Azərbaycan Kanoe və Avarçəkmə Federasiyasının birgə təşkilatçılığı ilə Mingəçevirdə avarçəkmə üzrə Azərbaycan çempionatı keçirilir.

Yarışın ilk günündə rəsmi açılış mərasimi olub.

Tədbir Azərbaycan Dövlət Himninin səsləndirilməsi ilə başlanılıb. Açılış mərasimində çıxış edən rəsmilər ölkəmizdə dövlət tərəfindən idmana, idmançılara göstərilən diqqətdən söz açıb. Qeyd olunub ki, bu gün ölkəmizdə irimiqyaslı idman tədbirləri təşkil olunur, idmançılarımız müxtəlif beynəlxalq turnirlərdə uğurlu nəticələr qazanırlar. Bu da dövlətimizin başçısı İlham Əliyev və birinci xanım Mehriban Əliyevanın Azərbaycan idmanına xüsusi qayğısının nəticəsidir.

Açılış mərasimindən sonra yarışlara start verilib. “Kür” Olimpiya Tədris-İdman Mərkəzində təşkil olunan çempionatda Bakı və Mingəçevirdən olan 100-ə yaxın idmançı mübarizə aparır. İştirakçılar akademik avarçəkmə, həmçinin kayak və kanoe növlərində birincilik üçün yarışır.

Azərbaycan çempionatına sabah yekun vurulacaq. Qaliblər medal və diplomla mükafatlandırılmaqla yanaşı, fərqlənən idmançılar oktyabrda təşkil ediləcək beynəlxalq Mingəçevir Reqatasında mübarizə aparmaq şansı qazanacaqlar.