Boks üzrə Avropa Olimpiya Təsnifat Turnirinin yeri və vaxtı dəqiqləşib. Azərbaycan Boks Federasiyasından verilən məlumata görə Tokio-2020 Yay Olimpiya Oyunlarına vəsiqələrin sahibləri Fransanın paytaxtı Parisdə bəlli olacaq.

Yarışa iyunun 4-də start veriləcək və 8-də həlledici final döyüşləri ilə yekunlaşacaq. Amerika Olimpiya Təsnifat Turniri isə 10-16 may günlərində Argentinanın paytaxtı Buenos- Ayresdə keçiriləcək.

Qeyd edək ki, Avropa Olimpiya Təsnifat Turniri ötən il martın 14-də Böyük Britaniyanın paytaxtı Londonda başlamışdı. Lakin yarış üç gündən sonra koronavirus pandemiyası üzündən dayandırılmışdı. Qeyd edək ki, Azərbaycan millisinin heyətində hələlik yalnız bir nəfər – Tayfur Əliyev (57 kq) Olimpiadada iştirak hüququ qazanıb.