Azərbaycan idmançıları bu oyunlarda yüksək nəticə göstəriblər. 9 idman növündə ölkəmizi təmsil edən 21 yeniyetmə idmançımız 12 medal (5 qızıl, 6 gümüş, 1 bürünc) əldə edib.  Azərbaycan bu göstəricilə dünyanın 201 ölkəsi sırasında 10-cu yeri tutub.

Azərbaycanın üçrəngli bayrağını açılış mərasimində güləşçi İqbal Hacızadə aparıb. Yarışların ilk günündə cüdoçularımız Natiq Qurbanlı və Leyla Əliyeva, həmçinin taekvondoçu Cerən Özbək finalda məğlub olaraq gümüş medala yiyələniblər. Azərbaycan növbəti medalını yarışların 4-cü günü əldə edib. Taekvondoçu Səid Quliyev finalda Almaniya idmançısına qalib gələrək qızıl medal qazanıb. Həmin gün həmçinin akademik avarçəkmə idmanında mübarizə aparan Boris Yotov gümüş medala sevinib. Bu medal Azərbaycanın akademik avarçəkmə idmanında əldə etdiyi birinci medal idi.

Olimpiya Oyunlarının son üç günü isə Azərbaycan üçün daha uğurlu olub. Güləşçilər İslambəy Dadov, Teymur Məmmədov və İqbal Hacızadə bütün rəqiblərinə qalib gələrək fəxri kürsünün ilk pilləsinə qalxıb. Cabbar Nəcəfov və Leyla Qurbanova isə yalnız finalda məğlub olaraq gümüş medal qazanıb. Atletikada mübarizə aparan Nazim Babayev bürünc, boksçu Rüfət Hüseynov isə qızıl medalla Vətənə dönüb.